Klikoni më poshtë për videon e plotë:
Procesi i rivlerësimit të pasurive të paluajtshme, i shumëpritur nga qytetarët dhe i shtyrë për një kohë të gjatë, më në fund ka marrë dritën jeshile.
Qeveria ka miratuar udhëzimin që përcakton procedurat dhe mënyrën e zbatimit të këtij procesi, duke i hapur rrugë aplikimit në praktikë.
Sipas vendimit, në rrethe do të zbatohen referencat e vjetra, ndërsa përjashtim bën Tirana, ku do të aplikohen referenca të reja, të përafruara me zhvillimet e fundit të tregut.
Për të analizuar ndikimin e këtij vendimi në tregun e pasurive të paluajtshme, në ‘MCN Economy’ eksperti i tregut imobiliar, Orgest Beti, e cilësoi procesin si të vonuar, por të domosdoshëm.
Është pritur gjatë dhe ka krijuar një ngërç në tregun e pasurive të paluajtshme. Rivlerësimi është i mirëpritur sepse do të zhbllokojë një pjesë të madhe të apartamenteve, si për shitje ashtu edhe për qira. Mjafton të shohësh transaksionet te noterët për të kuptuar se tregu ka qenë i ngadalësuar.
Sipas Betit, faktorët që kanë ndikuar në rritjen e çmimeve janë të shumtë: kostoja e lartë e ndërtimit, pjesa që përfiton pronari i truallit (deri në 40% në Tiranë), si dhe rritja e çmimeve të materialeve si pasojë e luftës në Ukrainë. Ai shtoi se kërkesa është rritur ndjeshëm dhe se nuk pritet një ulje e çmimeve në një afat të shkurtër.
Ky proces ka mbajtur peng shumë shitje. Është i nevojshëm dhe i domosdoshëm. Referencat e reja në Tiranë reflektojnë realitetin e tregut, ndërsa në qytetet e tjera çmimet mbeten më të ulëta. Megjithatë, rivlerësimi duhet të funksionojë si mekanizëm i vazhdueshëm dhe jo me periudha të ndërprera, pasi tregu është dinamik dhe i ndikuar nga inflacioni dhe rritja e kostove.
Nga ana tjetër, eksperti Ervin Demirxhiu vuri theksin te ndryshimet në zonat bregdetare dhe te niveli i tarifave.
Ndryshimet më të ndjeshme priten në bregdet. Në Tiranë mund të ketë korrigjime të vogla, pasi një pjesë e madhe e territorit është rishikuar më herët. Shifrat janë më të larta krahasuar me proceset e kaluara, por duhet parë edhe në raport me fitimin që realizohet nga shitja.
Sipas Demirxhiut, edhe pse tarifat e rivlerësimit konsiderohen më të larta, historia ka treguar se ky është një proces i nevojshëm, edhe për ata qytetarë që nuk planifikojnë menjëherë të shesin pronën.
Me normën 5% do të ketë më shumë hapësirë për negocim mes palëve. Diferenca e përfitimit mund të negociohet. Edhe ata që sot nuk e shohin si të domosdoshëm, në të ardhmen do ta kuptojnë rëndësinë e rivlerësimit.
Procesi i ri i rivlerësimit pritet të ndikojë drejtpërdrejt në ritmin e transaksioneve dhe në formalizimin e mëtejshëm të tregut imobiliar, duke sjellë një fazë të re zhvillimi për sektorin e pasurive të paluajtshme në vend.
